Ministrja e Mjedisit, Fitore Pacolli, ka kërkuar që Kosova të ketë qasje të plotë në mekanizmat e financimit të Bashkimit Evropian për të mbështetur investimet dhe reformat në kuadër të Agjendës së Gjelbër.
Në një konferencë ministrore për Agjendën e Gjelbër për Ballkanin Perëndimor, të mbajtur në Zabljak të Malit të Zi, Pacolli tha se bashkëpunimi rajonal është i rëndësishëm për mbrojtjen e ujërave, menaxhimin e mbeturinave, zhvillimin e qëndrueshëm dhe përshpejtimin e tranzicionit të gjelbër.
Ajo kërkoi që Kosova të trajtohet në mënyrë të barabartë me vendet e tjera të rajonit dhe të përfshihet plotësisht në mekanizmat financiarë të BE-së, përcjell Energy Monitor.
Sipas Pacollit, qasja në këto mekanizma është e nevojshme për të mbështetur investimet, avancuar reformat dhe përshpejtuar zbatimin e Agjendës së Gjelbër në Kosovë.
Ajo tha se bashkëpunimi rajonal është i domosdoshëm për çështjet mjedisore që prekin të gjitha vendet e Ballkanit Perëndimor.
