Rruga kryesore që përdoret për transportimin e naftës saudite drejt Detit të Kuq ka qenë e mbyllur prej dy javësh pas sulmeve me dronë.
Çmimet e naftës ranë të martën në nivelin më të ulët të dy javëve, pasi Arabia Saudite sinjalizoi se po përgatitej të rifillonte funksionimin e tubacionit kryesor Lindje-Perëndim dhe eksportet e naftës bruto nga brigjet e saj në Detin e Kuq.
Nafta Brent, standardi ndërkombëtar i referencës, ra me më shumë se 2%, nën 98 dollarë për fuçi.
Ajo tregtohej me 98.40 dollarë për fuçi, duke e çuar rënien gjatë javës në më shumë se 5%. Nafta amerikane WTI ra me 2.7%, në 93.16 dollarë për fuçi.
Të martën, një person në dijeni të situatës konfirmoi raportimet se flukset në tubacion do të rifillonin deri në fund të javës. Saudi Aramco, kompania kombëtare e naftës, nuk iu përgjigj menjëherë një kërkese për koment.
Tregtarët kanë shitur gjithashtu naftë, të nxitur nga pritshmëritë se takimet diplomatike të kësaj jave mes Iranit, Kinës dhe SHBA-së mund të sjellin një përparim në përpjekjet për t’i dhënë fund konfliktit në Lindjen e Mesme.
Çmimet e naftës ishin rritur deri në 109 dollarë për fuçi pasi Arabia Saudite mbylli tubacionin Lindje-Perëndim pothuajse dy javë më parë, pas një serie sulmesh me dronë që shkatërruan stacione pompimi dhe shkaktuan disa të plagosur.
Tubacioni, me gjatësi 1,200 kilometra, shtrihet nga fushat kryesore të naftës në lindje të mbretërisë deri në portin Yanbu në Detin e Kuq, në perëndim. Ai i ka mundësuar Arabisë Saudite të vijojë eksportet e naftës pavarësisht sulmeve iraniane ndaj anijeve që kalojnë nëpër Ngushticën e Hormuzit, rruga kryesore për transportin e naftës së Gjirit drejt tregjeve botërore.
Nuk ishte e qartë se sa naftë do të mund të transportohej përmes tubacionit pas rifillimit të funksionimit. Kapaciteti i tij zyrtar është rreth 7 milionë fuçi naftë në ditë.
June Goh, analiste në Sparta Commodities, tha se nëse do të rikthehej vetëm një e katërta e flukseve përmes tubacionit, nuk do të kishte naftë shtesë për eksport, pasi këto sasi do të përdoreshin nga rafineritë saudite në bregun perëndimor.
Sipas përllogaritjeve të saj, nëse rikthehet 40% e kapacitetit të tubacionit, në treg do të shtohen rreth 1 milion fuçi naftë bruto në ditë.
Një pjesë e madhe e naftës që eksportohet nga Yanbu shkon drejt tregjeve europiane, ndërsa rafineritë në Europë u njoftuan javën e kaluar se nuk do të merrnin ngarkesat që u ishin caktuar për muajin tetor.
“Ndërprerja e tubacionit Lindje-Perëndim ka ndryshuar gjeografinë e eksporteve saudite brenda vetëm dy javësh”, thanë analistët e kompanisë së të dhënave energjetike Kpler, duke vënë në dukje se mbretëria e kishte ridrejtuar me shpejtësi naftën e saj për eksport përmes Ngushticës së Hormuzit pasi tubacioni u godit.
Ata vunë në dukje se ngarkimet në portin Juaymah, në Gjirin Persik, ishin rritur pesëfish krahasuar me ritmin e muajit gusht dhe se më 20 shtator të gjitha vendet e ankorimit në port ishin të zëna.
/FT
