Shqipëria ka nënshkruar një Memorandum Mirëkuptimi me kompaninë italiane ENI S.p.A., me qëllim studimin e fizibilitetit për krijimin e kapaciteteve kombëtare të furnizimit dhe magazinimit të produkteve të naftës dhe gazit, si pjesë e përpjekjeve për forcimin e sigurisë energjetike dhe rritjen e rolit të vendit në tregun rajonal të energjisë.
Memorandumi u nënshkrua në prani të kryeministrit Edi Rama nga ministri i Infrastrukturës dhe Energjisë, Enea Karakaçi, dhe ministrja e Shtetit për Sipërmarrjen dhe Klimën e Biznesit, Delina Ibrahimaj.
Sipas palëve, marrëveshja hap rrugën për realizimin e studimeve teknike, ekonomike, financiare, ligjore dhe rregullatore që do të vlerësojnë mundësinë e krijimit të një HUB-i kombëtar për produktet energjetike, si dhe zhvillimin e kapaciteteve për magazinimin e rezervave strategjike të naftës dhe gazit.
Ministri Karakaçi tha se siguria energjetike është një element themelor i sigurisë kombëtare dhe zhvillimit ekonomik, duke theksuar se objektivi i qeverisë është rritja e sigurisë së furnizimit dhe ulja e ekspozimit ndaj luhatjeve të tregjeve ndërkombëtare.
Ai bëri të ditur se Ministria e Infrastrukturës dhe Energjisë ka përgatitur edhe projektligjin për krijimin dhe menaxhimin e rezervave strategjike të naftës, i cili pritet t’i dërgohet Kuvendit për shqyrtim.
“Nuk po marrim një vendim përfundimtar për një investim, por po ndërmarrim hapin e nevojshëm për të studiuar me seriozitet të gjitha alternativat që mund të kontribuojnë në sigurinë energjetike të vendit”, deklaroi Karakaçi.
Kryeministri Edi Rama e cilësoi marrëveshjen si hapin e parë drejt krijimit të një strukture të re që do të mund të garantonte rezervat strategjike të tregut të hidrokarbureve në Shqipëri.
Sipas tij, bashkëpunimi me ENI-n lidhet me synimin për të ndërtuar një model të ri në tregun e hidrokarbureve, i cili do të forconte sigurinë e furnizimit dhe do të rriste kapacitetet e vendit për përballimin e krizave të mundshme energjetike.
ENI është një nga kompanitë më të mëdha energjetike në Evropë dhe prej vitesh operon në Shqipëri në sektorin e hidrokarbureve. Përmes memorandumit të ri, kompania do të mbështesë analizimin e mundësive për zhvillimin e infrastrukturës së magazinimit dhe furnizimit me produkte energjetike, ndërsa çdo vendim për investime konkrete do të varet nga rezultatet e studimeve të fizibilitetit që do të realizohen në fazat e ardhshme.
