Komisioni Evropian ka lansuar një iniciativë të përbashkët për të përshpejtuar zhvillimin e kapaciteteve të ruajtjes së energjisë në Bashkimin Evropian, me 22 shtete anëtare që janë zotuar të mbështesin instalimin e 30 deri në 35 GW kapaciteteve shtesë të ruajtjes/baterive gjatë dy viteve të ardhshme.
Programi bashkon qeveritë, institucionet financiare dhe kompanitë energjetike në një përpjekje për të rritur kapacitetet e magazinimit të energjisë, në një kohë kur prodhimi i energjisë nga burimet e ripërtëritshme po rritet vazhdimisht. Sipas Komisionit, BE-ja do të ketë nevojë për rreth 200 GW kapacitete ruajtëse deri në vitin 2030, krahasuar me rreth 55 GW aktualisht në funksion.
Në kuadër të kësaj iniciative, zhvilluesit e sistemeve të baterive, termocentraleve hibride dhe projekteve të energjisë së ripërtëritshme do të dorëzojnë parashikime vjetore që përfshijnë investimet e planifikuara dhe kapacitetet e reja. Edhe industritë me konsum të lartë energjie janë pajtuar të zgjerojnë përdorimin e sistemeve të ruajtjes në objektet e tyre dhe të ofrojnë të dhëna më të detajuara mbi kërkesën për energji elektrike, me qëllim përmirësimin e planifikimit të rrjetit, përcjell Energy Monitor.
Vendet pjesëmarrëse do të punojnë për masa që e bëjnë sistemin elektrik më fleksibël, përfshirë vendosjen e tarifave të rrjetit që reflektojnë kostot reale dhe që janë jo-diskriminuese, aty ku është e përshtatshme. Qeveritë janë zotuar gjithashtu të përdorin instrumente financimi kombëtare dhe të BE-së për të mbështetur projektet e ruajtjes së energjisë dhe prodhimin e pajisjeve përkatëse, në përputhje me rregullat ekzistuese për ndihmën shtetërore, përfshirë Kornizën e Ndihmës Shtetërore për Industrinë e Gjelbër (CISAF).
Bankat dhe institucionet e tjera financiare që marrin pjesë në program do të bashkëpunojnë me Grupin e Bankës Evropiane të Investimeve për të përmirësuar qasjen në financim dhe për të ofruar mbështetje teknike për investimet në ruajtjen e energjisë.
Komisioni Evropian do të monitorojë zbatimin e iniciativës përmes rishikimeve vjetore deri në vitin 2028. Po ashtu, ai planifikon të ndihmojë shtetet anëtare në hartimin e skemave mbështetëse për ruajtjen e energjisë, të shqyrtojë fonde shtesë përmes Fondit të Inovacionit, të përditësojë rregullat e rrjetit elektrik për të përshtatur më mirë teknologjitë e ruajtjes dhe të konsiderojë ndryshime të mëtejshme në kuadër të rishikimit të Kornizës së BE-së për Taksonominë në vitin 2027.
