Prodhuesi gjerman i turbinave me erë Nordex ka njoftuar se po përshpejton zgjerimin e tij në tregjet evropiane, duke përfshirë edhe Ballkanin, të cilin e sheh si një nga rajonet me potencialin më të madh për rritje në vitet e ardhshme.
Sipas kompanisë, kapaciteti operativ në Evropë pritet të rritet me rreth 37% brenda dy viteve, në kuadër të zgjerimit të portofolit të projekteve dhe rritjes së kërkesës për energji nga burimet e ripërtëritshme.
Në një ngjarje të organizuar në Beograd, drejtues të Nordex theksuan se Ballkani po fiton rëndësi gjithnjë e më të madhe brenda strategjisë së kompanisë, duke u bërë pjesë e rajonit të Evropës Juglindore dhe Mesdheut Lindor, ku kërkesa për energji të erës është në rritje të vazhdueshme, ka njoftuar Balkan Green Energy News.
Përfaqësues të kompanisë konfirmuan gjithashtu se Nordex po planifikon hyrjen në tregje të reja në Shqipëri, Maqedoninë e Veriut dhe Bullgari, duke zgjeruar më tej praninë e saj në rajon përtej tregjeve ku tashmë është aktive.
Aktualisht, kompania ka një portofol prej rreth 2.3 GW në rajonin e Evropës Juglindore, me rreth 1.2 GW tashmë të instaluar dhe pjesën tjetër në fazë ndërtimi. Nordex ka realizuar projekte të shumta në Kroaci, Greqi dhe Serbi, duke forcuar pozicionin e saj si një nga furnizuesit kryesorë të turbinave në rajon, përcjell Energy Monitor.
Drejtuesit e kompanisë theksuan se Ballkani po shndërrohet në një nga tregjet më dinamike për energjinë e erës në Evropë, i nxitur nga politikat e dekarbonizimit, integrimi me tregun energjetik të Bashkimit Evropian dhe rritja e investimeve në kapacitete të reja gjeneruese.
Nordex vlerëson se zhvillimi i mëtejshëm në rajon do të mbështetet nga projekte të reja dhe bashkëpunimi me partnerë lokalë, ndërsa kompania synon të forcojë rolin e saj si furnizues dhe partner afatgjatë në ndërtimin dhe operimin e projekteve të energjisë së erës.
