Maqedonia e Veriut pritet t’i bashkohet zyrtarisht në shtator Korridorit Vertikal të Gazit, një nismë që synon të rrisë diversifikimin dhe sigurinë e furnizimit me gaz në rajon.
Ministrja e Energjetikës e Maqedonisë së Veriut, Sanja Bozhinovska, ka thënë se anëtarësimi në Korridorin Vertikal përbën një mundësi strategjike për vendin dhe për integrimin e tij më të madh në rrjetin evropian të energjisë.
Sipas saj, përmes interkonektorëve me Greqinë dhe Serbinë, Maqedonia e Veriut do të ketë qasje në burime dhe rrugë të reja të furnizimit me gaz natyror, përfshirë gazin natyror të lëngshëm (LNG), përcjell Energy Monitor.
Bozhinovska tha se lidhjet e reja do të kontribuojnë në rritjen e sigurisë energjetike dhe në uljen e varësisë së vendit nga një burim i vetëm i furnizimit.
Infrastruktura e interkonektorëve është planifikuar gjithashtu që të mundësojë transportin e hidrogjenit 100%, duke e pozicionuar Maqedoninë e Veriut për integrim në infrastrukturën e ardhshme evropiane të hidrogjenit.
“Më shumë burime, siguri më e madhe dhe lidhje më e fortë rajonale”, ka shkruar Bozhinovska.
