Operatori i Sistemit, Transmetimit dhe Tregut të energjisë elektrike (KOSTT) ka mohuar deklarimet dhe raportimet se kompania EFT LLC do të furnizojë qytetarët e Republikës së Kosovës me energji elektrike më 28 nëntor 2025.
Në një sqarim zyrtar, KOSTT ka bërë të ditur se, bazuar në të dhënat e Operatorit të Tregut, EFT LLC nuk ka rezervuar në SEE CAO kapacitete ndërkufitare për furnizimin e konsumit të brendshëm në Kosovë, por vetëm për qëllime transiti të energjisë elektrike.
Sipas KOSTT-it, palët tregtare që marrin pjesë në tregtinë ndërkufitare rezervojnë kapacitete nëpërmjet SEE CAO për import dhe eksport të energjisë. Të hyrat e gjeneruara nga shfrytëzimi i këtyre kapaciteteve ndahen mes operatorëve të sistemeve të transmetimit të vendeve përkatëse, në përputhje me metodologjinë e përcaktuar nga SEE CAO.
KOSTT gjithashtu rikujtoi se është themeluese dhe aksionare e SEE CAO bashkë me shtatë operatorë të tjerë të Evropës Juglindore, përfshirë Kroacinë, Bosnjë dhe Hercegovinën, Malin e Zi, Shqipërinë, Greqinë, Turqinë dhe Maqedoninë e Veriut.
SEE CAO është institucioni përgjegjës për alokimin e kapaciteteve ndërkufitare të transmetimit në dhjetë kufij të zonave të ofertimit në rajon, përmes ankandeve eksplicite të bazuara në metodologjinë Net Transfer Capacity (NTC), në pajtim me rregulloren evropiane 714/2009 dhe Traktatin e Komunitetit të Energjisë.
KOSTT doli me sqarim sepse në disa media dhe rrjete sociale ishte përhapur informacioni se kompania EFT do ta furnizonte Kosovën me energji më 28 nëntor. Këto raportime krijuan konfuzion publik dhe u interpretuan si një vendim zyrtar apo marrëveshje për furnizim.
Për të shmangur keqkuptimet dhe për të sqaruar situatën teknike, KOSTT reagoi duke theksuar se EFT kishte rezervuar kapacitete vetëm për tranzit të energjisë dhe se nuk kishte asnjë proces furnizimi të planifikuar për tregun e Kosovës.
Në fund, KOSTT theksoi se mbetet i përkushtuar për të forcuar besimin publik përmes komunikimit të përgjegjshëm dhe informimit korrekt.
