Mbi 130 të rinj nga Shtimja dhe Podujeva janë bërë pjesë e një nisme për promovimin e një të ardhmeje më të gjelbër dhe më efikase në energji, përmes Klubeve të Efiçiencës së Energjisë.
Kjo iniciativë është pjesë e lëvizjes më të gjerë “Green Rising”, e cila synon të vendosë të rinjtë në qendër të veprimit klimatik në Kosovë, duke i angazhuar në projekte konkrete për kursimin dhe menaxhimin e energjisë.
Nisma realizohet në bashkëpunim me European Bank for Reconstruction and Development në Kosovë, Fondin e Kosovës për Efiçiencë të Energjisë (KEEF) dhe organizatën TOKA.
Përmes këtyre klubeve, të rinjtë po mësojnë si të ulin konsumin e energjisë në shkolla, të rrisin ndërgjegjësimin në komunitet dhe të kontribuojnë në zgjidhje praktike për sfidat mjedisore.
Organizatorët theksojnë se përfshirja e të rinjve në këtë proces i kthen ata nga përfitues në kontribuues aktivë të tranzicionit të gjelbër në Kosovë, duke ndihmuar në ndërtimin e një të ardhmeje më të qëndrueshme./Katror.info
