Global Energy Solutions dhe Hotas Solar LLC kanë nënshkruar një marrëveshje bashkëpunimi për zhvillimin, financimin dhe ndërtimin e projekteve të energjisë së ripërtëritshme në Kosovë, Shqipëri dhe vende të tjera të rajonit.
Marrëveshja është nënshkruar nga Drejtori Ekzekutiv i Global Energy Solutions, Ilir M. Shala, dhe Drejtoresha Ekzekutive e Hotas Solar, Ana Tolaj.
Sipas marrëveshjes, Global Energy Solutions do të fokusohet në zhvillimin e projekteve deri në fazën “Ready-to-Build” (RTB), përfshirë strukturimin e tyre dhe përgatitjen e marrëveshjeve për blerje të energjisë (PPA), ndërsa Hotas Solar do të merret me investimin dhe realizimin e projekteve në terren, transmeton Energy Monitor.
Ky bashkëpunim synon të përshpejtojë zhvillimin e projekteve të energjisë së pastër në rajon, duke rritur kapacitetet investuese dhe duke forcuar zinxhirin e zhvillimit të projekteve energjetike nga faza e planifikimit deri te ndërtimi.
Sipas palëve, marrëveshja përfaqëson një hap të rëndësishëm drejt forcimit të investimeve në energjinë e ripërtëritshme dhe mbështetjes së tranzicionit energjetik në Kosovë dhe rajonin e Ballkanit Perëndimor.
