PPC Group ka rritur ndjeshëm planin e saj strategjik të investimeve, duke parashikuar rreth 24 miliardë euro deri në vitin 2030, me fokus të qartë në zgjerimin në Evropën Juglindore dhe Ballkan.
Pjesa më e madhe e investimeve do të drejtohet në energjinë e ripërtëritshme, prodhimin fleksibël (përfshirë gazin) dhe infrastrukturën energjetike, me synimin për të rritur kapacitetin total në mbi 24 GW.
Rajoni i Ballkanit dhe Evropës Qendrore e Lindore shihet si një treg kyç për rritje, me investime të planifikuara në vende si Rumani, Bullgari dhe Kroaci, si dhe hyrje në tregje të reja si Hungari, Poloni dhe Sllovaki, njofton Balkan Green Energy News.
Në këtë kuadër, kompania synon të shfrytëzojë sinergjitë rajonale mes burimeve të ndryshme energjetike, duke përfituar nga potenciali i erës dhe diellit në vende të ndryshme dhe duke rritur shkëmbimet ndërkufitare të energjisë.
Një element i ri në strategji është edhe zhvillimi i qendrave të të dhënave (data centers), me një projekt të parë prej 300 MW në Greqi dhe plane për zgjerim në rajon, përcjell Energy Monitor.
Për financimin e këtij plani ambicioz, PPC Group parashikon edhe një rritje kapitali prej rreth 4 miliardë eurosh, duke përfshirë investitorë institucionalë dhe mbështetje nga shteti grek.
Ky zhvillim e pozicionon kompaninë si një nga aktorët kryesorë në tranzicionin energjetik të rajonit, me synim rritjen e kapaciteteve të pastra dhe forcimin e integrimit energjetik në Evropën Juglindore.
