Në Istog është përuruar implementimi i masave të efiçiencës së energjisë në dy objekte me rëndësi të veçantë për komunitetin – një ndërtesë sociale shumëbanesore dhe çerdhen “Gëzimi Ynë”.
Projekti për banesën sociale është financuar 90% nga Bashkimi Evropian dhe 10% nga Komuna e Istogut, ndërsa investimi në çerdhe është financuar nga Qeveria e Kosovës dhe është zbatuar nga Fondi i Kosovës për Efiçiencë të Energjisë (FKEE).
Ministrja në detyrë e Ekonomisë, Artane Rizvanolli, tha se investimi në banesën sociale përfshin 18 familje në nevojë, përfshirë gra kryefamiljare dhe nëna vetushqyese, duke e cilësuar projektin pjesë të programit më të gjerë për mbështetjen e familjeve të cenueshme përmes masave të kursimit të energjisë, transmeton Energy Monitor.
Sipas saj, projekti është pjesë e një programi prej 6.6 milionë eurosh që përfshin 28 banesa sociale në 13 komuna të Kosovës, në kuadër të paketës së Bashkimit Evropian për përballimin e krizës energjetike.
Nga ana tjetër, drejtuesit e FKEE-së bënë të ditur se investimet në ndërtesën sociale kanë mundësuar kursim të energjisë deri në 80%, ndërsa vlera e projektit arrin afër 200 mijë euro.
Përfaqësuesi i Bashkimit Evropian në Kosovë, Hubert Perr, tha se përmes paketës energjetike prej 75 milionë eurosh, BE-ja ka mbështetur mbi 45 mijë qytetarë në Kosovë përmes investimeve në izolim të objekteve, pajisje efiçiente dhe masa të tjera për kursim të energjisë.
Sipas institucioneve, këto investime synojnë përmirësimin e kushteve të jetesës, uljen e konsumit të energjisë dhe krijimin e objekteve më të ngrohta gjatë dimrit dhe më efikase gjatë verës.
