Volkswagen ka zëvendësuar kositëset tradicionale të barit me një zgjidhje shumë më natyrale dhe miqësore me mjedisin: 100 dele. Tashmë, një tufë prej 100 delesh po kullot nën më shumë se 31 mijë panele diellore në fermën fotovoltaike që furnizon me energji fabrikën e Volkswagen në Poznan të Polonisë, duke bërë shumë më tepër sesa thjesht prerjen e barit.
Kafshët janë bërë pjesë e një prej projekteve më moderne të agrivoltaikës në Evropë, ku prodhimi i energjisë diellore dhe aktiviteti bujqësor zhvillohen në të njëjtën sipërfaqe.
Delet zëvendësojnë makineritë
Në vend që të përdorë kositëse mekanike për mirëmbajtjen e hapësirave mes paneleve diellore, Volkswagen vendosi të përdorë tufën e deleve për të kontrolluar në mënyrë natyrale vegjetacionin, përfshirë edhe barin që rritet poshtë vetë paneleve.
Në të njëjtën kohë, panelet diellore krijojnë hije që ndihmojnë kafshët të mbrohen nga temperaturat e larta gjatë ditëve të nxehta të verës. Delet pritet të qëndrojnë në këtë “detyrë” deri në vjeshtë, nën kujdesin e fermerëve dhe mbarështuesve lokalë.
Një central që furnizon fabrikën me energji
Instalimi fotovoltaik prej 18.3 MW është ndërtuar dhe menaxhohet nga kompania gjermane Quanta Energy.
Në ditët me diell, parku diellor mund të prodhojë energji të mjaftueshme për të mbuluar të gjithë konsumin e fabrikës, ndërsa gjatë një viti të plotë ai siguron rreth 25% të nevojave energjetike të uzinës së Volkswagen në Poznan. Fabrika prodhon, ndër të tjera, edhe furgonin elektrik Volkswagen e-Crafter.
Projekti po monitorohet nga shkencëtarët
Projekti nuk ka vetëm përfitime ekonomike dhe mjedisore, por edhe vlerë shkencore. Volkswagen po bashkëpunon me Universitetin e Shkencave të Jetës në Poznan, ku studiuesit po analizojnë ndikimin e kullotjes në mirëqenien e kafshëve, biodiversitetin, cilësinë e tokës, vegjetacionin dhe mikroklimën e zonës.
Një nga pyetjet kryesore të studimit është nëse hija e krijuar nga panelet diellore ndihmon realisht në uljen e stresit termik tek kafshët gjatë muajve të verës. “Deri më sot, ferma fotovoltaike ka ofruar shumë më tepër sesa energji të gjelbër. Ajo është kthyer në një hapësirë që mbështet biodiversitetin, bujqësinë lokale dhe kërkimin shkencor”, deklaroi Marzena Pillich-Grońska, drejtoreshë e Volkswagen Poznań. Sipas saj, projekti demonstron se industria moderne dhe natyra mund të bashkëjetojnë në harmoni.
Një fitore për të gjithë
Përveç anës simpatike të historisë, zgjidhja sjell edhe përfitime konkrete: redukton kostot e mirëmbajtjes, ul emetimet e karbonit dhe krijon habitat për insekte dhe specie të tjera të egra.
Një fitore për Volkswagen, për studiuesit dhe sigurisht për 100 delet që tashmë kanë një nga vendet më të pazakonta të punës në Evropë.
