Jarrah Jaber Al-Ahmad Al-Sabah është ministri i parë i Jashtëm kuvajtian që viziton Seulin që nga viti 2007.
Ministri i Jashtëm i Koresë së Jugut, Cho Hyun dhe homologu i tij kuvajtian, Jarrah Jaber Al-Ahmad Al-Sabah zhvilluan të martën bisedime për forcimin e bashkëpunimit dypalësh në disa fusha, përfshirë energjinë dhe infrastrukturën, në mes të konfliktit në Lindjen e Mesme, transmeton Anadolu.
Dy ministrat e Jashtëm zhvilluan gjithashtu diskutime të hollësishme mbi situatën në Lindjen e Mesme, në mes të tensioneve të vazhdueshme mes SHBA-së dhe Iranit, raportoi Yonhap me seli në Seul, duke cituar Ministrinë e Jashtme të Koresë së Jugut.
Al-Sabah udhëtoi drejt Seulit nga Kina, ku zhvilloi bisedime me ministrin e Jashtëm kinez, Wang Yi, ndërsa Kuvajti u përball me sulme në shkallë të gjerë me dronë dhe raketa nga Irani, në kundërpërgjigje ndaj sulmeve ajrore amerikane.
Kuvajti, së bashku me vendet e tjera të Gjirit, pret baza dhe asete ushtarake amerikane.
Në një deklaratë, Ministria e Jashtme e Kuvajtit tha se dy diplomatët e lartë theksuan rëndësinë e avancimit të marrëdhënieve dypalëshe në një mënyrë që u shërben interesave të përbashkëta të të dyja vendeve.
Në deklaratë u shtua se Emiri i Kuvajtit, Sheikh Mishal Al-Ahmad Al-Jaber Al-Sabah, i dërgoi një letër presidentit të Koresë së Jugut, Lee Jae Myung, duke theksuar lidhjet e qëndrueshme mes dy vendeve dhe popujve, mënyrat për forcimin dhe zhvillimin e marrëdhënieve, si dhe zhvillimet aktuale në rajon.
Vizita e Al-Sabah shënoi vizitën e parë të një ministri të Jashtëm kuvajtian në Korenë e Jugut që nga viti 2007.
Sipas Ministrisë së Jashtme të Koresë së Jugut, Kuvajti ishte burimi i pestë më i madh i naftës së papërpunuar për Korenë e Jugut dhe tregu i katërt më i madh jashtë vendit për ndërtimin e projekteve të Koresë së Jugut në vitin 2025.
Koreja e Jugut dhe Kuvajti vendosën marrëdhënie diplomatike më 11 qershor 1979, ndërsa tregtia dypalëshe vjetore arrin në rreth 10 miliardë dollarë.
/aa.com.tr
