Qeveria e Malit të Zi ka ulur sërish akcizat për benzinën dhe naftën, në përpjekje për të zbutur ndikimin e rritjes së çmimeve të karburanteve në tregun ndërkombëtar. Masa është në fuqi nga 25 gushti deri më 5 shtator 2026.
Sipas vendimit të Qeverisë, akciza për benzinën pa plumb është ulur me 5%, në 0.522 euro për litër, ndërsa akciza për naftën që përdoret si karburant motorik është ulur me 20%, në 0.352 euro për litër.
Kjo është një tjetër ndërhyrje e Qeverisë malazeze për të kufizuar ndikimin e lëvizjeve të çmimeve ndërkombëtare të naftës në tregun vendas.
Si rezultat i masës së re, nga 25 gushti çmimi maksimal me pakicë i Eurosuper 98 është 1.79 euro për litër, ndërsa Eurosuper 95 kushton 1.76 euro dhe Eurodizeli 1.87 euro për litër. Çmimi i vajit për ngrohje është caktuar në 1.83 euro për litër, njofton Energy Monitor.
Krahasuar me çmimet që ishin në fuqi nga 18 deri më 24 gusht, Eurodizeli dhe Eurosuper 98 janë liruar me nga 1 cent për litër, ndërsa çmimi i Eurosuper 95 ka mbetur i pandryshuar.
Sipas mediave malazeze, norma e rregullt e akcizës për naftën është 0.44 euro për litër, që do të thotë se ulja e re e ka reduktuar këtë barrë me 8.8 cent për litër. Për benzinën, norma e re prej 0.522 euro për litër përfaqëson një ulje nga norma e rregullt prej 0.549 euro.
Vendimi i ri do të zbatohet deri më 5 shtator, ndërsa çmimet aktuale të karburanteve vlejnë deri më 31 gusht. Pas kësaj date do të bëhet llogaritja e radhës dhe çmimet e reja, nëse ndryshojnë, do të zbatohen nga 1 shtatori.
Qeveria e Malit të Zi ka ndërhyrë disa herë gjatë këtij viti në akcizat e karburanteve. Në korrik, ajo kishte vendosur të vazhdonte uljen e akcizës për Eurodizelin gjatë sezonit turistik, duke e përshtatur nivelin e uljes në varësi të zhvillimeve të tregut.
Ndërhyrjet e fundit lidhen me rritjen e çmimeve të naftës dhe produkteve të naftës në tregjet ndërkombëtare, të ndikuara edhe nga tensionet gjeopolitike dhe problemet në transportin dhe furnizimin global.
