Gjermania ka ndarë 480 MW kapacitet në ankandin e saj të inovacionit për projekte që kombinojnë energjinë diellore me sistemet e magazinimit të energjisë.
Agjencia Federale e Rrjetit (Bundesnetzagentur) pranoi 32 oferta, me kapacitet të përgjithshëm prej 480 MW. Ankandi kishte në dispozicion 475 MW, ndërsa kompanitë kishin paraqitur gjithsej 53 oferta për 678 MW, duke e bërë procedurën të mbingarkuar.
Të gjitha projektet e përzgjedhura janë kombinime të centraleve solare dhe baterive. Çmimet fituese variojnë nga 4.50 deri në 5.40 cent për kWh, ndërsa çmimi mesatar i ponderuar ishte 5.14 cent për kWh, më i ulët se 5.34 cent në ankandin paraprak, përcjell Energy Monitor.
Bavaria mori pjesën më të madhe të kapacitetit të ndarë, me 177 MW në 12 projekte, e ndjekur nga Brandenburg me 94 MW dhe North Rhine-Westphalia me 48 MW.
Ankandet e inovacionit në Gjermani synojnë projekte që kombinojnë teknologji të ndryshme të energjisë së ripërtëritshme dhe magazinimit. Rritja e projekteve solare me bateri synon të mundësojë përdorimin e energjisë së prodhuar gjatë orëve me prodhim të lartë edhe në periudhat kur kërkesa është më e madhe.
Në të njëjtën procedurë, ankandi për biometan mori vetëm tre oferta për 6 MW, nga 21 MW kapacitet të ofruar, duke treguar interes shumë më të ulët për këtë teknologji.
