Forcat ajrore ukrainase deklaruan se kishin interceptuar 254 nga 285 dronët rusë të përdorur gjatë sulmit.
Rusia ka ndërmarrë një nga sulmet më të mëdha të muajve të fundit ndaj infrastrukturës energjetike të Ukrainës, duke goditur centrale dhe objekte të tjera kritike në Kiev dhe në disa rajone të vendit. Sipas autoriteteve ukrainase, 7 persona kanë humbur jetën, mes tyre edhe një fëmijë.
Sulmet e së mërkurës kanë shkaktuar ndërprerje të energjisë në Kiev dhe në tri rajone përreth. Operatorët e rrjetit elektrik njoftuan se kjo ishte hera e parë që kryeqyteti përballej me masa të tilla që prej pranverës.
Forcat ajrore ukrainase deklaruan se kishin interceptuar 254 nga 285 dronët rusë të përdorur gjatë sulmit, ndërsa Rusia përdori gjithashtu raketa balistike. Autoritetet raportuan dëme në një central të rëndësishëm dhe në objekte të tjera energjetike pranë kryeqytetit.
Pas ndërprerjeve, disa tramvaje në Kiev ndaluan së funksionuari, ndërsa presioni i ujit në sistemin e furnizimit të qytetit u ul. Kryeqyteti u zgjua nën një re tymi pas sulmeve gjatë natës, ndërsa alarmet ajrore zgjatën për më shumë se 12 orë.
Presidenti Volodymyr Zelensky tha se infrastruktura kritike ishte goditur në 5 rajone, ndërsa dëme të tjera u raportuan në 5 rajone të tjera.
Autoritetet ukrainase kanë urdhëruar kontrollin e sistemeve rezervë të energjisë në objektet kritike, ndërsa vendi po përgatitet për dimrin dhe temperaturat e ulëta.
Ndërkohë, tre dronë rusë kanë hyrë në hapësirën ajrore të Moldavisë. Rumania dhe Polonia aktivizuan avionët ushtarakë, ndërsa përkohësisht u pezulluan edhe fluturimet në dy aeroporte polake.
Moska mohon se synon civilët, ndërsa Kievi akuzon Rusinë se po përdor të ftohtin, errësirën dhe ndërprerjet e energjisë si pjesë të presionit ndaj popullsisë ukrainase.
