Kompania kineze Sungrow është përzgjedhur për instalimin e një sistemi të ruajtjes së energjisë me bateri prej 130 MWh në “Project Blue”, një nga projektet më të mëdha private të energjisë diellore në Shqipëri.
Marrëveshja përfshin furnizimin me 26 njësi baterish PowerTitan 2.0 dhe 13 njësi MVS3460-LS, ndërsa sistemi do të instalohet në kompleksin fotovoltaik “Blue” në qarkun e Fierit. Parku aktual ka kapacitet prej 185 MWp.
Sungrow, prodhues global i pajisjeve për energjinë fotovoltaike dhe sistemet e magazinimit, tha se teknologjia e saj me ftohje të lëngshme do të ndihmojë në rritjen e fleksibilitetit të rrjetit dhe integrimin e energjisë së prodhuar nga burimet diellore, përcjell Energy monitor.
“Project Blue” zhvillohet dhe zotërohet bashkërisht nga kompanitë shqiptare Matrix Konstruksion dhe Blessed Investment Group. Projekti është zhvilluar në faza dhe funksionon pa subvencione shtetërore, me energjinë e prodhuar që tregtohet në tregun e lirë.
Përveç sistemit prej 130 MWh, zhvilluesit planifikojnë një zgjerim të mëtejshëm të “Project Blue”. Faza e ardhshme parashikon shtimin e 164 MWp kapacitete fotovoltaike dhe një sistem të ri baterish me fuqi 80 MW dhe kapacitet ruajtjeje 180 MWh.
Kjo do ta çojë projektin në një shkallë dukshëm më të madhe, duke e shndërruar magazinimin e energjisë në një pjesë të rëndësishme të modelit të zhvillimit të parkut.
Zhvillimi i “Project Blue” vjen në një periudhë kur bateritë po bëhen gjithnjë e më të rëndësishme për sektorin energjetik shqiptar. Rritja e shpejtë e kapaciteteve fotovoltaike ka shtuar nevojën për të zhvendosur një pjesë të energjisë së prodhuar gjatë orëve me diell drejt periudhave me kërkesë më të lartë.
Në prill, Enti Rregullator i Energjisë nisi procedurat për ndryshimin e licencave të disa centraleve fotovoltaike, përfshirë “SPV Blue 1” dhe “SPV Blue 2”, me qëllim përfshirjen e njësive të depozitimit të energjisë.
Ndërkohë, në maj BERZH bëri të ditur se po shqyrtonte një kredi prej 53 milionë eurosh për një pjesë të “Project Blue”, që përfshin rreth 160 MWp energji diellore dhe një sistem BESS prej 60 MW.
Edhe qeveria shqiptare ka filluar ta përfshijë magazinimin në politikat e reja për energjinë diellore. Ministria e Infrastrukturës dhe Energjisë ka paralajmëruar se ankandi i ardhshëm për energjinë fotovoltaike do të përfshijë edhe bateritë, ndërsa ligji i ri për sektorin e energjisë elektrike ka krijuar bazën për integrimin e sistemeve të ruajtjes në projektet e energjisë së ripërtëritshme.
