Ministria e Mjedisit ka pranuar studimin shkencor për vlerat natyrore të Malit Mokna dhe Liqenit të Ujmanit, duke hapur rrugën për procedurat e mëtejshme që këto dy zona të shpallen të mbrojtura. Ministrja Fitore Pacolli ka bërë të ditur se dokumenti do t’i paraprijë dërgimit të nismës në Kuvend për votim përfundimtar.
Sipas Pacollit, shpallja e tyre si zona të mbrojtura do të rriste pjesën e territorit të Kosovës nën mbrojtje nga 11% në 12.4%.
Ndryshe, ministria kishte njoftuar më 27 tetor 2025 se Mali Mokna dhe Liqeni i Ujmanit ishin vendosur nën mbrojtje paraprake, në një sipërfaqe prej 192.19 kilometrash katrorë. Sipas njoftimit të atëhershëm, kjo e kishte çuar territorin e mbrojtur në 12.4%, përcjell Energy Monitor.
Mali Mokna shtrihet në rajonin e Dukagjinit, në pjesën e Alpeve Shqiptare, pranë kufirit me Malin e Zi dhe Serbinë.
Ndërkaq, Liqeni i Ujmanit ndodhet në veri të Kosovës dhe përbën një nga rezervuarët më të rëndësishëm ujorë të vendit.
Vendimi i vitit të kaluar për mbrojtje paraprake mbulonte një sipërfaqe prej 192.19 kilometrash katrorë. Ministria kishte theksuar atëherë se studimi njëvjeçar në terren kishte evidentuar biodiversitet të pasur, ekosisteme të ndjeshme dhe peizazhe me rëndësi ekologjike e shkencore.
Pranimi i studimit të ri përbën një hap të mëtejshëm drejt përcaktimit të statusit përfundimtar të këtyre zonave.
