Rreth 2,500 konsumatorë në disa zona të Prishtinës mbetën pa energji elektrike të martën në mbrëmje, pas një avarie në nënstacionin elektrik 110/20 kV “Prishtina 6”. Furnizimi është rikthyer në të gjitha zonat e prekura, ka njoftuar KEDS.
Ndërprerja preku një pjesë të kryeqytetit, përfshirë Kampusin Universitar, lagjen Aktash dhe lagjen Pejton.
Pas njoftimit për avarinë, KEDS bëri të ditur se ekipet teknike ishin dërguar në terren për të identifikuar dhe sanimin e problemit, me qëllim të rikthimit sa më të shpejtë të furnizimit me energji elektrike.
Më vonë gjatë mbrëmjes, kompania njoftoi se intervenimi kishte përfunduar dhe se furnizimi ishte rikthyer në të gjitha zonat e prekura.
Avaria ishte regjistruar në nënstacionin “Prishtina 6”, i cili është pjesë e infrastrukturës së shpërndarjes së energjisë elektrike në kryeqytet. Nënstacionet e këtij lloji transformojnë energjinë nga niveli 110 kV në 20 kV, përmes të cilit furnizohen rrjetet e tensionit të mesëm që shpërndajnë energjinë drejt konsumatorëve.
KEDS nuk ka dhënë detaje shtesë për shkakun teknik të avarisë.



