Rreth 100 shtëpi në lagjen Hysenaj të fshatit Petrovë të Shtimes mbetën për rreth 18 orë pa energji elektrike, pas një defekti në rrjetin elektrik, i cili sipas banorëve është i vjetruar.
Furnizimi me energji elektrike u rikthye të mërkurën, më 18 nëntor, në mbrëmje, pasi ekipet e KEDS-it intervenuan në terren.
Sipas raportimit të Kallxo.com, defekti kishte ndodhur rreth mesnatës, ndërmjet së martës dhe së mërkurës. Banorët kanë thënë se gjatë ditës kishin bërë disa përpjekje për të raportuar problemin, por ekipet e mirëmbajtjes nuk kishin intervenuar deri në orët e mbrëmjes.
Ermal Hysenaj, njëri nga banorët e lagjes, ka deklaruar se mungesa e energjisë elektrike kishte shkaktuar vështirësi edhe në furnizimin me ujë, pasi ndërprerja e rrymës kishte pamundësuar funksionimin e pajisjeve që përdorin energjinë elektrike për furnizim me ujë.
Banorët e kishin raportuar rastin edhe në Stacionin Policor të Shtimes, me shpresën se përmes Policisë do të përshpejtohej intervenimi i KEDS-it.
Zëdhënësi i Policisë Rajonale të Ferizajt, Kanun Veseli, ka konfirmuar se Policia e Shtimes kishte pranuar ankesën e një qytetari nga lagjja Hysenaj më 18 nëntor, në orën 10:10. Sipas tij, ankesa ishte regjistruar në logun e ankesave dhe përcjellë në Drejtorinë Rajonale të Policisë në Ferizaj, si dhe përmes telefonit në zyrën qendrore të KEDS-it në Prishtinë.
Kallxo.com ka bërë të ditur se i ka dërguar KEDS-it pyetje lidhur me ndërprerjen e furnizimit dhe kohën e intervenimit, por nuk kishte marrë përgjigje deri në publikimin e raportimit.
Defekti u riparua të mërkurën në mbrëmje, pas rreth 18 orësh ndërprerje për banorët e lagjes.



