Sekretari amerikan i Shtetit, Marco Rubio, ka deklaruar se politika e jashtme e administratës së presidentit Donald Trump po riorientohet rreth interesave ekonomike dhe strategjike të Shteteve të Bashkuara, duke përfshirë energjinë, burimet kritike, tregtinë dhe sigurinë.
Në dëshminë e tij para Komitetit për Marrëdhëniet me Jashtë të Senatit më 2 qershor, Rubio tha se politika e jashtme amerikane duhet të shërbejë drejtpërdrejt interesit kombëtar të SHBA-së.
Sipas tij, politika e jashtme nuk mund të ndahet nga politika ekonomike, politika kufitare apo politika energjetike, pasi fuqia kombëtare varet edhe nga aftësia e një vendi për të prodhuar, ndërtuar dhe siguruar burimet që i nevojiten.
“Një vend që nuk mund të ndërtojë anije, të prodhojë ilaçe, të kontrollojë migrimin ose të ketë qasje në burime jetike, nuk mund të mbrojë njerëzit, interesat apo mënyrën e tij të jetesës”, tha Rubio në fjalimin e tij, përcjell Energy Monitor.
Energjia dhe burimet kritike në qendër të strategjisë
Rubio e lidhi forcimin e ekonomisë amerikane edhe me sigurimin e qasjes në minerale kritike dhe burime strategjike, si dhe me rindërtimin e zinxhirëve të furnizimit në SHBA.
Në kuadër të buxhetit të propozuar për vitin fiskal 2027, ai përmendi programe që synojnë financimin e investimeve strategjike, sigurimin e burimeve kritike dhe rritjen e konkurrueshmërisë amerikane në industritë e së ardhmes.
Sekretari amerikan tha gjithashtu se administrata Trump po e ndryshon mënyrën e përdorimit të ndihmës së jashtme, duke e orientuar atë drejt tregtisë, investimeve dhe partneriteteve me përfitim të ndërsjellë, në vend të varësisë afatgjatë nga ndihmat.
Sipas Rubio, çdo dollar i shpenzuar nga SHBA-ja jashtë vendit duhet të kontribuojë në sigurinë, fuqinë ekonomike ose prosperitetin amerikan.
Qasja e re, sipas tij, synon që politika ekonomike dhe energjetike të jenë pjesë e drejtpërdrejtë e politikës së jashtme amerikane, veçanërisht në një periudhë kur siguria e burimeve, zinxhirët e furnizimit dhe konkurrenca për industritë strategjike po marrin rëndësi gjithnjë e më të madhe.
