Vala e të nxehtit dhe rënia e prodhimit nga hidrocentralet dhe centralet bërthamore kanë shkaktuar rritje të fortë të çmimeve të energjisë elektrike në Evropën Juglindore, me çmime që gjatë ditëve të fundit kanë kaluar edhe 700 euro për MWh.
Sipas një analize të Balkan Green Energy News, e cila ka krahasuar çmimet në tregjet ditë-përpara të shtatë vendeve të rajonit, çmimi më i lartë prej 717 euro/MWh u regjistrua në bursën sllovene më 3 gusht.
Në përgjithësi, çmimet në rajon u rritën me rreth 50–100% krahasuar me javët paraprake. Rritjet më të mëdha u regjistruan në orët e mbrëmjes, kur prodhimi diellor bie ndërsa kërkesa për energji mbetet e lartë.
Problemet janë përkeqësuar edhe nga nivelet e ulëta të ujit në lumenj. Në Hungari, centrali bërthamor Paks është detyruar të ulë prodhimin me rreth 90%, ndërsa centrali Cernavodă në Rumani ka reduktuar prodhimin me rreth 50%. Edhe centrali bërthamor Krshko në Slloveni ka ulur kapacitetin për shkak të temperaturave të larta të ujit në lumin Sava, përcjell Energy Monitor.
Probleme ka pasur edhe në prodhimin hidroenergjetik. Në Serbi, hidrocentrali Đerdap 1 po operon me vetëm rreth 20% të prodhimit normal, ndërsa Gjerdap 2 me rreth 30%.
Në të njëjtën kohë, konsumi i energjisë në vendet e rajonit është rritur me 5–20%, kryesisht për shkak të përdorimit më të madh të pajisjeve për ftohje.
Sipas analizës, Greqia dhe Bullgaria kanë regjistruar çmimet më të ulëta në rajon, një zhvillim që lidhet edhe me kapacitetet e tyre të mëdha të energjisë diellore dhe baterive. Greqia ka rreth 9 GW kapacitet diellor dhe 1 GW bateri, ndërsa Bullgaria rreth 6 GW diellore dhe 3.7 GW bateri, njofton Energy Monitor.
Zhvillimet tregojnë se temperaturat ekstreme mund të godasin njëkohësisht të dyja anët e tregut të energjisë: kërkesa rritet ndjeshëm, ndërsa prodhimi nga disa prej burimeve kryesore bie.
Për Kosovën, zhvillimet në tregjet e Evropës Juglindore janë veçanërisht të rëndësishme për shkak të varësisë së vendit nga importet e energjisë elektrike në periudhat kur prodhimi vendor nuk mjafton.
Ky është një tjetër shembull se si kushtet ekstreme të motit, nivelet e ujit dhe struktura e kapaciteteve prodhuese mund të ndikojnë drejtpërdrejt në çmimin e energjisë në rajon.
