Një sistem i ri ngrohjeje me rreze infra të kuqe, i integruar drejtpërdrejt në tavan, është prezantuar në kuadër të Expo Real Kosova 2026.
Sistemi i prezantuar nga EcoTech Efficiency përdor panele ngrohëse prej gipsi, të cilat mund të integrohen në konstruksionin e tavanit dhe të bëhen praktikisht të padukshme pas përfundimit të punimeve.
Ndryshe nga sistemet tradicionale, teknologjia nuk përdor radiatorë, tubacione, bojler apo qarkullim uji. Ngrohja realizohet përmes rrezatimit infra të kuq, ndërsa sistemi funksionon pa ventilatorë dhe pa qarkullim të detyruar të ajrit.
Sipas të dhënave të prezantuara nga kompania, një panel ka fuqi rreth 450–500 W dhe, në objekte me izolim të mirë, mund të përdoret për një sipërfaqe orientuese prej rreth 18–20 metrash katrorë, në varësi të karakteristikave të objektit, njofton Energy Monitor.
Panelet mund të vendosen në tavane të reja Knauf ose të instalohen në tavane ekzistuese. Sistemi lejon gjithashtu kontrollin individual të temperaturës përmes termostatëve inteligjentë Wi-Fi dhe aplikacionit Smart Life.
Një tjetër mundësi është kombinimi i sistemit me panele fotovoltaike, duke e bërë atë të përshtatshëm për ndërtesa që synojnë konsum më të ulët të energjisë dhe integrim më të madh të burimeve të ripërtëritshme.
Sipas dokumentacionit teknik të prodhuesit, produkti ka dokumentacion dhe testime teknike në Gjermani, përfshirë certifikimin CE dhe testime nga TÜV SÜD dhe PEUTZ. Kompania deklaron gjithashtu garanci pesëvjeçare për produktin.
Teknologjia synohet për përdorim në banesa, vila, hotele, zyra, objekte të reja ndërtimore dhe projekte të renovimit.
