Kompania shtetërore kroate e energjisë Hrvatska Elektroprivreda (HEP) ka nisur procedurën për vlerësimin e ndikimit në mjedis për ndërtimin e një hidrocentrali reversibil me kapacitet deri në 160 MW në zonën e Vinodolit, në qarkun Primorje-Gorski Kotar.
Sipas njoftimit të Ministrisë kroate të Mbrojtjes së Mjedisit, projekti do të ketë dy rezervuarë: një rezervuar ekzistues në pjesën e poshtme, në rreth 60 metra mbi nivelin e detit, dhe një rezervuar të ri në pjesën e sipërme, në shpatet e malit Medvedjak, rreth 800 metra mbi nivelin e detit.
Hidrocentrali reversibil do të funksionojë edhe si një sistem për ruajtjen e energjisë. Kur ka tepricë të energjisë elektrike, uji pompohet nga rezervuari i poshtëm drejt atij të sipërm. Kur kërkesa për energji rritet, uji lëshohet përsëri poshtë përmes turbinave për të prodhuar energji elektrike. Kjo e bën teknologjinë veçanërisht të përshtatshme për të mbështetur integrimin e energjisë së erës dhe asaj diellore, përcjell Energy Monitor.
Projekti është ende në fazën e procedurave mjedisore dhe ndërtimi nuk ka nisur. Raporti për vlerësimin e ndikimit në mjedis do t’i nënshtrohet procedurave përkatëse dhe konsultimit publik.
HEP thotë se hidrocentrali është pjesë e një sistemi më të gjerë hidroenergjetik dhe tashmë përdor infrastrukturë që lidh rezervuarët e sistemit me hidrocentralin. Projekti i ri do të shtojë funksionin e pompimit dhe ruajtjes së energjisë në këtë zonë.
Në të njëjtën zonë ndodhet edhe hidrocentrali ekzistues Vinodol, me kapacitet prej 90 MW.
