Termocentrali bërthamor i Krshkos në Slloveni ka rikthyer prodhimin e reaktorit në 100% të kapacitetit, pas përmirësimit të kushteve meteorologjike dhe uljes së temperaturave të ajrit dhe ujit të lumit Sava.
Reaktori e ka arritur sërish kapacitetin e plotë më 18 gusht, pasi më herët gjatë muajit prodhimi ishte reduktuar për shkak të temperaturave të larta dhe kushteve të lumit Sava, i cili përdoret për ftohjen e centralit.
Më 6 gusht, centrali e kishte ulur prodhimin në 80%, ndërsa më 14 gusht e kishte rritur në 90%, pas përmirësimit të kushteve. Kufizimet ishin vendosur për të respektuar kërkesat mjedisore lidhur me temperaturën dhe rrjedhën e ujit të Savës, përcjell Energy Monitor.
Krshko ka një kapacitet prej rreth 696 MW dhe është në pronësi të përbashkët të Sllovenisë dhe Kroacisë. Energjia e prodhuar nga centrali luan një rol të rëndësishëm në furnizimin me energji elektrike të të dyja vendeve.
Rikthimi i reaktorit në kapacitet të plotë vjen pas një periudhe kur temperaturat e larta të verës kufizuan prodhimin. Rasti tregon gjithashtu se kushtet klimatike dhe temperaturat e lumenjve mund të ndikojnë drejtpërdrejt në funksionimin e centraleve që përdorin ujërat sipërfaqësore për ftohje.
