Kryeministri i Maqedonisë së Veriut, Hristijan Mickoski, tha se qytetarët mund të presin një dimër të qëndrueshëm sa i përket furnizimit me energji elektrike, ndërsa Qeveria po punon që nga janari çmimi i energjisë të mbetet i pandryshuar ose të vazhdojë tarifa e lirë.
Mickoski tha se akumulimet e ujit janë ruajtur në kohë dhe aktualisht janë rreth 50%, ndërsa riparimet në termocentrale janë duke përfunduar. Sipas tij, shumica e përgatitjeve për sezonin e ngrohjes tashmë janë kryer.
“Pres të paktën të njëjtën situatë si tani, që të mos kemi rritje ose kërcime”, tha Mickoski, duke shtuar se nuk pret turbulenca sa i përket furnizimit me energji elektrike.
Ai tha gjithashtu se marrëveshja për furnizimin me qymyr nga Kosova është nënshkruar në kohë dhe pritet të ulë ndjeshëm koston e prodhimit të energjisë elektrike në kapacitetet vendore.
Sa i përket gazit, Mickoski tha se nuk pret ndikim të madh në Maqedoninë e Veriut, edhe nëse çmimi në tregjet evropiane rritet ndjeshëm. Sipas tij, vendi nuk është konsumator i madh i gazit dhe përdorimi i centraleve të bashkëprodhimit ndihmon në amortizimin e kostove.
Mickoski tha se Qeveria po punon gjithashtu për uljen e çmimit të energjisë elektrike nga janari ose vazhdimin e tarifës së lirë për konsumatorët.
