Shumica e respondentëve të një pyetësori të Buletinit Ekonomik janë skeptikë se Kosova do ta arrijë deri në vitin 2030 objektivin që 35% e konsumit të energjisë elektrike të mbulohet nga burimet e ripërtëritshme.
Sipas rezultateve të publikuara nga Buletini Ekonomik më 30 shtator, 45 nga 56 respondentë, ose 80.4%, kanë deklaruar se nuk besojnë ose janë skeptikë se objektivi mund të arrihet, përcjell Energy Monitor.
Prej tyre, 27 respondentë kanë thënë se objektivi nuk mund të arrihet me ritmin aktual të zhvillimit të sektorit, ndërsa 18 janë shprehur skeptikë për mundësinë e realizimit të tij. Vetëm nëntë respondentë kanë deklaruar se besojnë se objektivi mund të arrihet.
Ndërprerjet dhe projektet e vonuara si shqetësime kryesore
Sipas Buletinit Ekonomik, 21 respondentë kanë veçuar ndërprerjet dhe pasigurinë e furnizimit me energji si shqetësimin kryesor, ndërsa 20 respondentë kanë përmendur vonesat në projektet e energjisë diellore dhe të erës.
Në pyetjen ku ishte e mundur të përzgjidheshin më shumë se një prioritet, 31 respondentë kanë zgjedhur rehabilitimin e termocentraleve ekzistuese, ndërsa 30 kanë përzgjedhur përshpejtimin e ndërtimit të kapaciteteve të reja solare dhe të erës.
Rezultatet pasqyrojnë kështu një shqetësim të dyfishtë te pjesëmarrësit: nevojën për siguri më të madhe të furnizimit dhe, njëkohësisht, përshpejtimin e investimeve në kapacitete të reja të energjisë së ripërtëritshme.
Buletini Ekonomik sqaron se pyetësori është realizuar përmes platformës CER Platform – Crowdsourcing Evidence, Engaging Citizens, Reporting Facts, si pjesë e përfshirjes së qytetarëve në temat e trajtuara nga mediumi.
Pyetësori është zhvilluar në kuadër të projektit “Society Against Corruption in Montenegro”, me referencë te Byroja për Demokraci, të Drejta të Njeriut dhe Punë e Departamentit të Shtetit të SHBA-së (DRL), dhe është zbatuar nga BIRN Kosova.
Buletini Ekonomik thekson se pyetësori ka mbledhur 56 përgjigje dhe se rezultatet pasqyrojnë qëndrimet e respondentëve pjesëmarrës.
