Maqedonia e Veriut ka prodhuar për herë të parë më shumë energji elektrike nga panelet solare sesa nga cilido burim tjetër, me energjinë diellore që ka mbuluar 32,8% të prodhimit vendor gjatë muajit gusht 2026.
Sipas të dhënave të Entit Shtetëror të Statistikave të Maqedonisë së Veriut, në gusht janë prodhuar gjithsej 506.386 megavat-orë (MWh) energji elektrike. Panelet solare kanë kontribuar me 32,8% të këtij prodhimi, duke u renditur para hidrocentraleve, të cilat kanë mbuluar 26,9%, dhe termocentraleve me 21,8%.
Pjesa tjetër e prodhimit është realizuar nga centralet e kombinuara, me 14,7%, dhe burimet e tjera, me 3,9%.
Ndërkohë, konsumi i përgjithshëm i energjisë elektrike në vend gjatë gushtit ka arritur në 520.849 MWh. Prodhimi vendor ka mbuluar 97,2% të konsumit, përcjell Energy Monitor.
Sipas të njëjtave të dhëna, gjatë muajit gusht në Maqedoninë e Veriut janë konsumuar edhe 17,563 milionë metra kub gaz natyror, 175.578 tonë qymyr dhe 119.046 tonë produkte të naftës.
Rritja e pjesëmarrjes së energjisë solare në prodhimin e energjisë elektrike shënon një zhvillim të rëndësishëm për sektorin energjetik të Maqedonisë së Veriut, ku për herë të parë panelet fotovoltaike janë bërë burimi me pjesën më të madhe të prodhimit mujor.
