Shoqata e Investitorëve të Huaj të Shqipërisë ka organizuar konferencë mbi energjinë e ripërtëritshme. Në edicionin e tretë, ekspertë dhe drejtues të sektorit diskutuan për strategjinë e rritjes dhe projektet deri ne vitin 2030.
Shoqata e Investitorëve të Huaj të Shqipërisë ka mbledhur në Tiranë drejtues të lartë të industrisë, politikbërës, rregullatorë dhe aktorë të tregut për edicionin e tretë të konferencës mbi energjinë e ripërtëritshme.
Në konferencën e organizuar, në bashkëpunim me Ministrinë e Infrastrukturës dhe Energjisë dhe Delegacionin e BE-së në Shqipëri, një vend të veçantë zuri Sekretariati i Komunitetit të Energjisë, i përfaqësuar nga Zëvendësdrejtorja Marie-Therese Richter-Kuhnert.
Prania aktive e Sekretariatit dëshmon njohjen ndërkombëtare të progresit të Shqipërisë në sektorin energjetik dhe angazhimin institucional për integrimin e vendit në tregun evropian të energjisë.
Nëpërmjet pesë sesioneve tematike, konferenca trajtoi zgjerimin e qëndrueshëm të energjisë diellore dhe të erës, fleksibilitetin e rrjetit, shkëmbimet energjetike ndërrajonale, ruajtjen e energjisë, mekanizmin CBAM dhe garancinë e origjinës.
Ministri i Infrastrukturës dhe Energjisë, Enea Karakaçi, theksoi se suksesi i deritanishëm i sektorit është rezultat i bashkëpunimit të ngushtë midis aktorëve të tregut dhe qeverisë shqiptare, duke shprehur besimin e tij për një vazhdimësi po aq të suksesshme drejt vitit 2030.
Konferenca e tretë e Shoqata e Investitorëve të Huaj të Shqipërisë mbi energjinë e ripërtëritshme konfirmoi rolin e kësaj shoqate si urë lidhëse midis komunitetit të investitorëve të huaj dhe institucioneve shqiptare e evropiane.
/euronews.al
