Qeveria e Shqipëria ka dhënë dritën jeshile për ndërtimin e dy parqeve solare me kapacitet të përgjithshëm prej 152 megavatësh, duke shënuar një tjetër hap drejt diversifikimit të burimeve të energjisë në vend.
Këshilli i Ministrave miratoi ndërtimin e 2 centraleve për gjenerimin e energjisë elektrike në jug të vendit, një në Kolonjë dhe tjetri në Devoll.
Sipas vendimit të fundit, projekti më i madh do të zhvillohet nga kompania Tekno Fire, e cila planifikon ndërtimin e një parku solar me kapacitet 102 MW pranë qytetit të Korçës. Ndërtimi pritet të përfundojë brenda tre vitesh, ndërsa kompania do të ketë të drejtën e operimit për një periudhë prej 49 vitesh.
Paralelisht, kompania Kronos Konstruksion ka marrë miratimin për ndërtimin e një centrali tjetër fotovoltaik me kapacitet 50 MW, po ashtu në zonën e Korçës, me të njëjtat afate ndërtimi dhe operimi, përcjell Energy Monitor.
Një element i veçantë i këtyre projekteve është obligimi që kompanitë të kontribuojnë për shtetin, duke dorëzuar pa pagesë 2% të prodhimit vjetor të energjisë ose ekuivalentin financiar të tij në buxhetin publik.
Zhvillimi i projekteve të reja solare vjen në një kohë kur Shqipëria po synon të reduktojë varësinë e saj të lartë nga hidrocentralet dhe të rrisë kapacitetet nga burimet e tjera të ripërtëritshme. Investime të tilla konsiderohen kyçe për rritjen e sigurisë energjetike dhe përmbushjen e objektivave klimatike të vendit.
