Udhëheqës nga mbi 40 vende evropiane janë mbledhur në Jerevan të Armenisë për Samitin e tetë të Komunitetit Politik Evropian (EPC), ku ndër temat kryesore të diskutimit janë bashkëpunimi në demokraci, siguri energjetike dhe lidhjet ekonomike.
Në këtë kuadër, Albin Kurti ka marrë pjesë në dy panele diskutimi mbi reziliencën demokratike dhe adresimin e kërcënimeve hibride, si dhe ka zhvilluar një sërë takimesh me liderë shtetesh dhe përfaqësues të institucioneve euroatlantike.
Gjatë samitit, Kurti është takuar me figura të larta ndërkombëtare, përfshirë Sekretarin e Përgjithshëm të NATO-s, përfaqësues të Bashkimit Evropian dhe liderë të vendeve evropiane, si dhe me presidentin e Ukrainës, Volodymyr Zelenskyy.
Ai ka theksuar përkushtimin e Kosovës për anëtarësim në Bashkimin Evropian dhe NATO, duke e konsideruar këtë si rrugë të domosdoshme për stabilitet dhe zhvillim të qëndrueshëm, si dhe ka bërë thirrje për njohje të mëtejshme ndërkombëtare dhe avancim të statusit të vendit në kandidat për anëtarësim në BE.
Në margjinat e samitit, Kurti ka marrë pjesë në darkën zyrtare të organizuar nga autoritetet armene dhe ka zhvilluar takime të shumta bilaterale, ku janë diskutuar zhvillimet aktuale në Evropë dhe mundësitë për thellimin e bashkëpunimit.
Ai është takuar gjithashtu me kryeministrin e Armenisë, Nikol Pashinyan, me të cilin ka biseduar për forcimin e marrëdhënieve dypalëshe, bashkëpunimin ekonomik, investimet dhe tregtinë, si dhe për rëndësinë e aleancave ndërmjet demokracive në një kontekst sfidues ndërkombëtar.
