Kompania kosovare Elektrostublla L.L.C. po merr pjesë në ngjarjen ndërkombëtare “Future Industry Minds 2026”, e cila po mbahet në Gjermani dhe konsiderohet një nga platformat më të rëndësishme evropiane për industrinë, energjinë, teknologjinë dhe inovacionin.
Gjatë këtij eventi, përfaqësuesit e kompanisë po zhvillojnë takime me kompani dhe partnerë ndërkombëtarë në fusha të ndryshme, përfshirë energjinë dhe dekarbonizimin, infrastrukturën elektroenergjetike, industrinë e mençur dhe inteligjencën artificiale, menaxhimin e objekteve, si dhe zinxhirin e furnizimit dhe logjistikën.
Nga kompania theksojnë se pjesëmarrja në këtë forum përfaqëson një mundësi të rëndësishme për krijimin e partneriteteve të reja strategjike dhe për zgjerimin e bashkëpunimit me kompani lider në tregun evropian, përcjell Energy Monitor.
Sipas Elektrostubllës, prezantimi në këtë ngjarje ndërkombëtare është pjesë e përpjekjeve për të forcuar pozicionin e kompanisë si një ndërmarrje profesionale nga Kosova, e orientuar drejt inovacionit, zhvillimit të qëndrueshëm dhe integrimit në tregjet ndërkombëtare.
