Maqedonia e Veriut mbuloi 88.8% të konsumit të brendshëm bruto të energjisë elektrike me prodhim vendor gjatë muajit prill 2026, sipas të dhënave paraprake të publikuara nga Enti Shtetëror i Statistikës.
Gjatë muajit prill, prodhimi bruto i energjisë elektrike arriti në 497,327 MWh, ndërsa konsumi i brendshëm bruto u regjistrua në 559,906 MWh. Kjo do të thotë se pjesa më e madhe e nevojave të vendit për energji elektrike u mbulua nga prodhimi vendas, ndërsa pjesa e mbetur u sigurua përmes importeve.
Sipas statistikave zyrtare, gjatë së njëjtës periudhë janë konsumuar gjithashtu 8.026 milionë metra kub gaz natyror, 268,515 ton qymyr dhe 83,924 ton produkte të naftës. Pothuajse i gjithë qymyri i konsumuar, përkatësisht 99.9%, është përdorur për prodhimin e energjisë elektrike, përcjell Energy Monitor.
Krahasuar me prillin e vitit 2025, konsumi i gazit natyror u rrit me 11.4%, si rezultat i aktivitetit më të lartë të termocentraleve kogjenerative, ndërsa konsumi i produkteve të naftës shënoi rënie prej 17.1%.
Të dhënat tregojnë një përmirësim të mbulimit të konsumit me prodhim vendor krahasuar me muajt e parë të vitit, kur ky tregues ishte 77.1% në janar, 83.2% në shkurt dhe 79.6% në mars.
