Gjashtë kompani nga Shtetet e Bashkuara kanë shprehur interes për të marrë pjesë në ndërtimin e hidrocentralit reverzibil “Iron Gate III” (Djerdap III), një nga projektet më të mëdha energjetike që Serbia planifikon të zhvillojë në vitet e ardhshme.
Lajmi është bërë i ditur nga ministrja serbe e Minierave dhe Energjisë, Dubravka Gjedomiq Handanoviq, e cila tha se ka përfunduar faza e shprehjes së interesit dhe se në vijim do të vlerësohen kompanitë që plotësojnë kriteret e përcaktuara.
Sipas transmetuesit publik serb RTS, vlera e investimit pritet të kalojë 2.63 miliardë euro, duke e renditur projektin ndër investimet më të mëdha infrastrukturore në sektorin energjetik të Serbisë.
Projekti “Iron Gate III” është planifikuar të ndërtohet në lumin Danub, në afërsi të hidrocentralit ekzistues “Iron Gate I” (Đerdap I), dhe do të funksionojë si hidrocentral reverzibil. Kjo teknologji mundëson ruajtjen e energjisë elektrike duke pompuar ujin në rezervuarë të sipërm gjatë periudhave kur prodhimi i energjisë është më i lartë se kërkesa, ndërsa uji rikthehet përmes turbinave për prodhim të energjisë gjatë periudhave me konsum të lartë.
Ministria serbe e Minierave dhe Energjisë e konsideron projektin me rëndësi strategjike, pasi ai pritet të rrisë fleksibilitetin e sistemit elektroenergjetik dhe të lehtësojë integrimin e burimeve të ripërtëritshme të energjisë, veçanërisht energjisë nga era dhe dielli, përcjell Energy Monitor.
Parametrat përfundimtarë të projektit, përfshirë kapacitetin e instaluar, numrin e njësive prodhuese dhe madhësinë e rezervuarëve, do të përcaktohen gjatë fazës së studimit të fizibilitetit dhe projektimit paraprak (FEED).
Thirrja publike për kompanitë amerikane u hap në qershor, në kuadër të marrëveshjes për bashkëpunim strategjik në sektorin e energjisë ndërmjet Serbisë dhe Shteteve të Bashkuara, e cila ka hyrë në fuqi në mars të vitit 2025.
Ndërkohë, Serbia dhe Rumania po avancojnë bashkëpunimin për këtë projekt. Muajin e kaluar, Qeveria e Rumanisë miratoi nisjen e negociatave për nënshkrimin e një Memorandumi të Mirëkuptimit me Serbinë për shkëmbimin e informacionit dhe koordinimin lidhur me zhvillimin e hidrocentralit reverzibil “Iron Gate III”.
Hidrocentralet reverzibile konsiderohen ndër teknologjitë më të rëndësishme për ruajtjen e energjisë në shkallë të gjerë, pasi mundësojnë balancimin e rrjeteve elektrike dhe rrisin fleksibilitetin e sistemeve energjetike me pjesëmarrje të lartë të burimeve të ripërtëritshme.
