Bursa shqiptaro-kosovare e energjisë elektrike ALPEX ka vazhduar trendin e rritjes edhe gjatë muajit qershor, duke regjistruar një rritje prej 45% të vëllimit të energjisë së tregtuar në tregun një-ditë-para (Day-Ahead Market) krahasuar me të njëjtën periudhë të vitit të kaluar.
Sipas të dhënave të publikuara nga ALPEX, gjatë muajit qershor u tregtuan gjithsej 225.5 GWh energji elektrike në tregun një-ditë-para, krahasuar me rreth 155.6 GWh në qershor të vitit 2025. Rritja pasqyron zgjerimin e vazhdueshëm të aktivitetit tregtar dhe pjesëmarrjen në rritje të operatorëve në bursën e përbashkët të Shqipërisë dhe Kosovës.
Në zonën e ofertimit të Shqipërisë u tregtuan rreth 157.8 GWh energji, ndërsa në zonën e ofertimit të Kosovës rreth 149.6 GWh. Çmimi mesatar i pastrimit të tregut ishte rreth 99 euro/MWh në Shqipëri dhe rreth 98 euro/MWh në Kosovë, duke treguar një nivel të lartë konvergence mes dy tregjeve, përcjell Energy Monitor.
Rezultatet e qershorit vijnë pas një tjetër muaji pozitiv për ALPEX. Edhe në maj bursa kishte regjistruar rekord të ri të tregtimit, me mbi 202 GWh energji të shkëmbyer dhe një rritje të fortë vjetore, duke konfirmuar trendin e zgjerimit të tregut të organizuar të energjisë elektrike.
ALPEX u krijua nga operatorët e sistemeve të transmetimit të Shqipërisë dhe Kosovës, OST dhe KOSTT, me synimin për të zhvilluar një treg transparent, konkurrues dhe të integruar të energjisë elektrike në rajon. Rritja e vazhdueshme e vëllimeve të tregtimit konsiderohet një tregues i maturimit të bursës dhe i interesimit gjithnjë e më të madh të pjesëmarrësve të tregut, njofton Energy Monitor.
Zhvillimi i ALPEX është pjesë e procesit të integrimit të tregjeve energjetike të Ballkanit Perëndimor me tregun evropian, duke krijuar kushte për një formim më transparent të çmimeve, rritje të likuiditetit dhe përdorim më efikas të kapaciteteve ndërkufitare të transmetimit.
