Kompania për Furnizim me Energji Elektrike (KESCO) ka vendosur një pikë informuese në hyrje të Qendrës Kryesore të Shërbimit për Konsumatorë në Prishtinë, me qëllim përmirësimin e komunikimit dhe reduktimin e kohës së pritjes për qytetarët.
Sipas kompanisë, punonjësit në këtë pikë do t’i udhëzojnë konsumatorët lidhur me procedurat, dokumentacionin e nevojshëm dhe shërbimet e ofruara, duke i drejtuar ata te sporteli përkatës që në kontaktin e parë.
KESCO ka bërë të ditur se kjo masë synon një proces më të organizuar të shërbimit dhe një përvojë më efikase për konsumatorët.
