Parku me erë Gvozd, me kapacitet prej 54.6 MW, ka prodhuar rreth 26 GWh energji elektrike gjatë tre muajve të parë të operimit, duke nisur punën në fillim të majit, njoftoi ndërmarrja shtetërore energjetike e Malit të Zi, EPCG.
Sipas EPCG-së, prodhimi i parkut ka ndihmuar në uljen e deficitit të përgjithshëm energjetik të kompanisë me rreth 8.5%. Me çmimet e tregut në bursën malazeze të energjisë MEPX, energjia e prodhuar nga Gvozd gjatë kësaj periudhe ka vlerë rreth 2.43 milionë euro.
Prodhimi nga parku ka ndihmuar gjithashtu në uljen e nevojës për importe gjatë muajve të verës, kur hidrocentralet e mëdha të Malit të Zi po përballen me kushte më të pafavorshme hidrologjike. Gvozd pritet të prodhojë rreth 150 GWh në vit, sasi e mjaftueshme për furnizimin e rreth 25 mijë familjeve, përcjell Energy Monitor.
Parku përbëhet nga tetë turbina të prodhuesit gjerman Nordex dhe ndodhet pranë fshatit Gvozd, në rrafshnaltën e Krnovos, në komunën e Nikshiqit.
Ky është një projekt i rëndësishëm për strategjinë e Malit të Zi për rritjen e prodhimit nga burimet e ripërtëritshme. EPCG po planifikon edhe Gvozd II, me kapacitet prej 21 MW, i cili do të shtojë tre turbina dhe do ta çojë kapacitetin total të kompleksit në rreth 75.6 MW. Së bashku, dy fazat pritet të prodhojnë më shumë se 210 GWh në vit.
Projekti Gvozd I është financuar me mbështetjen e Bankës Evropiane për Rindërtim dhe Zhvillim (BERZH), e cila ka miratuar një kredi prej 82 milionë eurosh për projektin, ndërsa për Gvozd II është siguruar një financim shtesë prej 26 milionë eurosh.
