Rumania mund të detyrohet të ndalë më 13 gusht reaktorin e fundit aktiv në centralin bërthamor të Cernavodës, pasi niveli i Danubit ka rënë në nivele rekord dhe po kufizon furnizimin me ujë për ftohjen e tij.
Centrali i Cernavodës siguron rreth 20% të prodhimit të energjisë elektrike në Rumani. Njëri nga dy reaktorët e centralit është ndalur tashmë në fund të korrikut, ndërsa reaktori i mbetur mund të ndalet nëse niveli i lumit vazhdon të bjerë, ka raportuar Reuters.
Sipas Reuters, prurja e Danubit në kufirin rumun ka rënë në rreth 1,370 metra kub në sekondë, niveli më i ulët i regjistruar ndonjëherë. Autoritetet rumune kanë ndërmarrë masa emergjente për të siguruar ujin e nevojshëm për ftohjen e reaktorit, përfshirë gërmimin e shtratit të lumit dhe devijimin e rrjedhës përmes strukturave të improvizuara.
Rënia e nivelit të ujit po ndodh në një periudhë me temperatura të larta dhe thatësirë në pjesë të mëdha të Evropës. Për shkak të presionit mbi sistemin energjetik, Rumania ka shpallur gjendje emergjente energjetike për muajin gusht dhe po shqyrton edhe masa për kufizimin e konsumit industrial në rast se situata përkeqësohet, përcjell Energy Monitor.
Problemi nuk është i izoluar vetëm në Rumani. Edhe centrali bërthamor i Hungarisë, Paks, është prekur nga niveli i ulët i Danubit, duke treguar se temperaturat e larta dhe mungesa e ujit po bëhen një rrezik gjithnjë e më i drejtpërdrejtë për infrastrukturën energjetike që varet nga uji për ftohje.
