Kosova ka prezantuar objektivat dhe angazhimet e saj për klimën dhe tranzicionin energjetik në Baku, në kuadër të Javës së 4-t të Klimës të UNFCCC-së.
Pjesëmarrja e Kosovës në këtë aktivitet ndërkombëtar u fokusua në Kontributin e Parë të Përcaktuar në Nivel Kombëtar (NDC), Agjendën e Gjelbër për Ballkanin Perëndimor dhe procesin e përafrimit me Bashkimin Evropian në fushën e klimës dhe energjisë.
Në aktivitet u diskutua edhe për partneritetin gjermano-kosovar për klimën dhe tranzicionin energjetik, përmes të cilit Gjermania dhe Kosova synojnë të mbështesin zbatimin e objektivave klimatike dhe energjetike.
Nga objektivat te investimet
Edonita Kashtanjeva, zyrtare e lartë për politika në Ministrinë e Ekonomisë, tha se veprimi klimatik duhet të përkthehet në investime konkrete.
“Veprimi klimatik nënkupton shndërrimin e angazhimeve tona në investime konkrete, zgjerimin e energjisë së ripërtëritshme, përmirësimin e efiçiencës së energjisë dhe krijimin e një sistemi energjetik më të pastër dhe më të sigurt për qytetarët tanë”, tha Kashtanjeva.
Sipas GIZ Kosovo, pjesëmarrja në Baku synoi gjithashtu krijimin e partneriteteve dhe shkëmbimin e përvojave që mund të ndihmojnë në përkthimin e objektivave klimatike të Kosovës në projekte dhe investime konkrete.
