Kroacia shqyrton 13 projekte baterish me kapacitet prej 854 megavatësh
September 24, 2026
Kroacia po shqyrton kërkesat për lidhjen në rrjet të 13 projekteve të baterive për ruajtjen e energjisë, me kapacitet të përgjithshëm prej rreth 854 MW, ndërsa interesi për sistemet e ruajtjes po rritet në vend.
Operatori kroat i sistemit të transmetimit, HOPS, është duke vlerësuar kërkesat për lidhjen e këtyre projekteve në rrjet. Për 392 MW të tjera të sistemeve të pavarura të ruajtjes dhe projekteve hibride janë dhënë tashmë vlerësime paraprake, ku kapaciteti i baterive arrin në 503 MW.
Zgjerimi i ruajtjes po mbështetet edhe nga fondet publike. Ministria e Ekonomisë ka ndarë 16.3 milionë euro për 47 projekte të baterive të kombinuara me impiante diellore. Projektet e kontraktuara pritet të sjellin më shumë se 100 MW kapacitet dhe rreth 250 MWh kapacitet ruajtjeje, përcjell Energy Monitor.
Vetëm rreth 30% e fondit fillestar prej 50 milionë eurosh është alokuar deri tani.
Ndër projektet më të mëdha janë ato të kompanisë shtetërore HEP. Në Korlat po shqyrtohet ndërtimi i një baterie prej rreth 300 MWh, si dhe një sistemi tjetër prej 90 MWh të lidhur me zgjerimin e planifikuar prej 40 MW të parkut diellor.
HEP po planifikon gjithashtu një bateri prej 200 MWh pranë projektit diellor Sukošan, ndërsa në termocentralin e Plominit po studiohet një sistem ruajtjeje me kapacitet deri në 500 MWh.
Edhe kompanitë private po zhvillojnë projekte të reja. IE-Energy dhe grupi slloven NGEN po planifikojnë një bateri të pavarur prej 60 MW/120 MWh pranë Shibenikut, ndërsa Versolvio po përgatit një projekt ruajtjeje prej 80 MW në kuadër të një zhvillimi diellor në Jagodnjak.
Rritja e interesit për bateritë lidhet me zgjerimin e prodhimit diellor në Kroaci. Prodhimi diellor i lidhur me rrjetin e transmetimit u rrit nga 5 GWh në vitin 2023 në 46 GWh në vitin 2024, ndërsa në vitin 2026 ka arritur në 168 GWh.
Bateritë po shihen si një mënyrë për ta ruajtur energjinë e prodhuar gjatë orëve me diell dhe për ta përdorur atë në mbrëmje, si dhe për të reduktuar kufizimin e prodhimit dhe nevojën për importe të energjisë elektrike.
