Qeveria e Kroacisë ka propozuar vendosjen e një norme fleksibile të TVSH-së për produktet e naftës, e cila do të aplikohej vetëm në raste emergjente, si përgjigje ndaj pasigurive në tregjet globale të energjisë.
Ndryshimet e propozuara në ligjin për TVSH synojnë t’i japin qeverisë më shumë fleksibilitet për të reaguar shpejt në situata të jashtëzakonshme, siç janë krizat energjetike apo rritjet e papritura të çmimeve, të ndikuara nga konflikti në Lindjen e Mesme.
Sipas ministrit të financave, aktualisht legjislacioni nuk lejon ndërhyrje të shpejtë dhe të targetuar në raste të tilla, duke kufizuar reagimin institucional kur kërkohet veprim urgjent, përcjell Energy Monitor.
Propozimi parashikon që qeveria të ketë të drejtë të ulë TVSH-në për produktet e naftës deri në 10 pikë përqindje nga niveli aktual prej 25%, në mënyrë të përkohshme dhe vetëm në rrethana të jashtëzakonshme.
Kjo masë synon të zbusë ndikimin e rritjes së çmimeve të energjisë mbi ekonominë dhe konsumatorët, duke krijuar një mekanizëm të shpejtë reagimi pa pasur nevojë për ndryshime të vazhdueshme ligjore në parlament.
