Zëvendësministri i Ekonomisë, Getoar Mjeku, është takuar me drejtorin menaxhues të Bankës Evropiane për Rindërtim dhe Zhvillim (BERZH) për Evropën Juglindore, Grzegorz Zielinski, me të cilin ka diskutuar mundësitë e zgjerimit të bashkëpunimit në sektorin e energjisë, përfshirë mbështetjen për ankandet e burimeve të ripërtëritshme dhe financimin e projekteve të efiçiencës energjetike.
Takimi është mbajtur më 11 nëntor në Prishtinë, gjatë vizitës së parë të Zielinskit në Kosovë që nga emërimi i tij në këtë pozitë, më 1 qershor 2026. Në takim morën pjesë edhe shefja e kabinetit të zëvendësministrit, Anyla Beqa, si dhe përfaqësues të delegacionit të BERZH-it.
Sipas njoftimit të Ministrisë së Ekonomisë, palët kanë vlerësuar partneritetin e deritanishëm dhe kanë diskutuar mënyrat se si banka mund të ndihmojë në shndërrimin e prioriteteve të Kosovës për tranzicionin energjetik në projekte konkrete.
Një nga fushat kryesore të diskutimit ishte mbështetja për hartimin dhe zbatimin e ankandeve për energjinë e ripërtëritshme. BERZH-i ka shprehur interesim për të vazhduar përkrahjen e këtyre proceseve, me synim rritjen e kapaciteteve vendore të prodhimit të energjisë së pastër dhe forcimin e sigurisë energjetike, përcjell Energy Monitor.
Kosova është në proces të zhvillimit të mekanizmave konkurrues për investimet në burimet e ripërtëritshme, ndërsa ankandi i parë për energjinë e erës, me kapacitet të planifikuar deri në 100 megavat, është një nga projektet kryesore në këtë drejtim.
BERZH-i ka mbështetur edhe më herët institucionet e Kosovës në përgatitjen e kornizës rregullative dhe mekanizmave të mbështetjes për investimet në energjinë e ripërtëritshme.
Një tjetër temë e diskutimit ishte zbatimi i projekteve të efiçiencës së energjisë dhe zgjerimi i mundësive të financimit për qytetarët dhe bizneset. Në këtë drejtim, palët kanë shqyrtuar mundësitë e zgjerimit të linjave kreditore përmes institucioneve financiare vendore dhe programeve të financimit të gjelbër.
Këto mekanizma synojnë të lehtësojnë investimet në teknologji të pastra, pajisje më efiçiente dhe masa që ulin konsumin e energjisë në ndërtesa dhe biznese.
Zëvendësministri Mjeku ka falënderuar BERZH-in për mbështetjen e vazhdueshme ndaj sektorit energjetik të Kosovës, duke theksuar rëndësinë e partneritetit me institucionet financiare ndërkombëtare për përshpejtimin e tranzicionit energjetik dhe zhvillimin ekonomik.
Të dyja palët kanë shprehur gatishmërinë për të vazhduar bashkëpunimin në projekte strategjike që synojnë një sektor energjetik më të qëndrueshëm, konkurrues dhe të integruar me tregjet evropiane.
