Zyra e Rregullatorit të Energjisë (ZRRE) ka vendosur të shtyjë procesin e liberalizimit të tregut të energjisë elektrike për konsumatorët e mëdhenj deri më 1 maj 2026, duke zgjatur afatin e planifikuar për daljen nga shërbimi universal.
Sipas njoftimit zyrtar, vendimi vjen si rezultat i nevojës për një analizë më të thelluar të të dhënave dhe kostove të ndërmarrjeve të rregulluara, në kuadër të procesit të rregullimit të tregut. ZRRE bëri të ditur se është duke kryer shqyrtim të detajuar dhe vlerësim të kostove, përpara se të marrë vendimet përfundimtare që lidhen me strukturën e tregut dhe tarifat.
Megjithatë, pavarësisht kësaj shtyrjeje, konsumatorët e kualifikuar – kryesisht bizneset e mëdha – do të kenë të drejtë që nga 1 prilli të zgjedhin furnizues alternativ dhe të kalojnë në tregun e hapur, nëse plotësojnë kushtet e përcaktuara, përcjell Energy Monitor.
Liberalizimi i tregut nënkupton që kompanitë e mëdha nuk do të furnizohen më me tarifa të rregulluara nga shteti, por do të duhet të sigurojnë energjinë përmes kontratave në tregun e lirë, çka mund të sjellë edhe luhatje të çmimeve në varësi të kushteve të tregut.
ZRRE theksoi se do të vazhdojë të monitorojë nga afër procesin dhe do të njoftojë publikun për çdo zhvillim të ri, ndërsa vendimi për shtyrje synon të sigurojë një tranzicion më të qëndrueshëm dhe të mirëmenaxhuar drejt liberalizimit të plotë të tregut të energjisë në Kosovë.
