Ambientalistë, qytetarë dhe aktivistë u mblodhën këtë të hënë para godinës së Korporatës Elektroenergjetike Shqiptare (KESH), duke kërkuar heqjen e TEC-eve lundruese nga Gjiri i Vlorës. Sipas tyre, këto impiante përbëjnë një barrë të rëndë ekonomike dhe një rrezik serioz për mjedisin.
Në qendër të protestës ishte ambientalisti Lavdosh Ferruni, i cili hodhi akuza të forta ndaj institucioneve shtetërore dhe drejtuesve të KESH-it. Ai kundërshtoi hapur planet për marrjen në dorëzim të TEC-eve të njohura si “Tigri 1” dhe “Tigri 3”, duke i cilësuar ato si një dështim të kushtueshëm dhe të pajustifikuar.
Ferruni paralajmëroi se projektet për zgjerimin e infrastrukturës energjetike në Gjirin e Vlorës, përfshirë ndërtimin e TEC-eve të tjera dhe terminaleve të gazit, do ta shndërrojnë zonën në një hapësirë industriale me pasoja të rënda për natyrën dhe ekonominë lokale. Ai i bëri thirrje drejtuesve të KESH-it të tërhiqen nga çdo vendimmarrje që, sipas tij, rrezikon të dëmtojë në mënyrë të pakthyeshme zonën.
Gjatë fjalës së tij, ambientalisti ngriti përgjegjësi direkte ndaj administratores së KESH-it, Vjola Haxhiademi, duke pretenduar se ajo mban përgjegjësi si për procesin aktual, ashtu edhe për vendimmarrjet që lidhen me kontratën fillestare të projektit, e cila daton që nga viti 2021. Ai e cilësoi këtë kontratë si të pafavorshme për shtetin, duke theksuar se një nga amendamentet parashikon që, në përfundim të qirasë, asetet të kalojnë në pronësi të KESH-it për një vlerë simbolike prej 1 euro.
Një tjetër pikë e fortë e kritikave lidhej me kostot e larta të projektit. Sipas Ferrunit, TEC-et u sollën në Shqipëri me argumentin e emergjencës energjetike, por për një periudhë të gjatë qëndruan jashtë funksionit. Ai theksoi se prodhimi i energjisë me naftë nga këto impiante është shumë më i shtrenjtë se çmimet e tregut, ndërsa përmendi edhe shpenzimet shtesë për mirëmbajtje, që i konsideroi të pajustifikuara.
Protestuesit përsëritën thirrjen “Reflekto, refuzo!”, duke kërkuar nga drejtuesit e KESH-it të ndalojnë procesin e marrjes në dorëzim të TEC-eve. Në të njëjtën kohë, Ferruni i bëri apel edhe ambasadorit të ri të Shteteve të Bashkuara që të përfshijë këtë çështje në luftën kundër korrupsionit, ndërsa kërkoi nga organet e drejtësisë hetim të plotë për përgjegjësit institucionalë.
Sipas tij, dëmi ekonomik për taksapaguesit shqiptarë tejkalon shifrën e 100 milionë eurove, ndërsa paralajmëroi se projektet e reja energjetike në zonë do të përkeqësojnë më tej ndikimin mjedisor në Gjirin e Vlorës.
