Kosova, së bashku me pesë vendet e tjera të Ballkanit Perëndimor, ka miratuar Deklaratën Ministrore të vitit 2026 për Agjendën e Gjelbër për Ballkanin Perëndimor.
Deklarata u miratua në kuadër të Procesit të Berlinit, gjatë takimit të tretë ministror për Agjendën e Gjelbër për Ballkanin Perëndimor, të mbajtur në Žabljak. Sipas GIZ Kosovo, vendet e rajonit kanë rënë dakord për një paketë veprimesh rajonale për adresimin e sfidave klimatike dhe mjedisore.
Për Kosovën, bashkëpunimi rajonal shihet si pjesë e procesit për përshpejtimin e tranzicionit të gjelbër, forcimin e veprimeve klimatike dhe përparimin drejt standardeve të Bashkimit Evropian në fushën e mjedisit dhe klimës.
Takimi theksoi gjithashtu nevojën që angazhimet e përbashkëta të kalojnë në fazën e zbatimit, duke i kthyer prioritetet rajonale në masa konkrete që mund të ndikojnë në komunitete, biznese dhe ekonomi, përcjell Energy Monitor.
Përfaqësuesja e Gjermanisë në takim, Bettina Hagedorn, Sekretare Parlamentare e Shtetit në Ministrinë Federale të Gjermanisë për Mjedisin, Mbrojtjen e Klimës, Ruajtjen e Natyrës dhe Sigurinë Bërthamore, tha se mbështetja e Gjermanisë për vendet e Ballkanit Perëndimor do të fokusohet në zbatimin e koordinuar, praktik, transparent dhe gjithëpërfshirës të angazhimeve të përbashkëta.
Takimi u zhvillua në kuadër të Procesit të Berlinit dhe të bashkëpunimit rajonal për zbatimin e Agjendës së Gjelbër për Ballkanin Perëndimor.
