Maqedonia e Veriut ka nisur këtë vit ndërtimin e sistemeve të ruajtjes së energjisë me bateri (BESS), ndërsa vendi ka miratuar dhjetëra projekte të reja që së bashku arrijnë në 2.2 GW fuqi dhe 4.9 GWh kapacitet magazinimi.
Sipas një analize të shoqatës Solar Macedonia, disa prej projekteve janë sisteme të pavarura baterish, ndërsa një numër i madh do të integrohen me centrale fotovoltaike ekzistuese ose të reja.
Në shkurt, Ministria e Energjisë, Minierave dhe Burimeve Minerale miratoi 96 objekte për ruajtjen e energjisë, prej të cilave 77 janë sisteme të integruara me impiante të reja ose ekzistuese, ndërsa 19 janë sisteme të pavarura. Në të njëjtin plan u përfshinë edhe 59 projekte diellore me kapacitet të kombinuar prej më shumë se 3 GW, përcjell Energy Monitor.
Profesori Dimitar Dimitrov nga Universiteti “Shën Kirili dhe Metodi” në Shkup dhe Solar Macedonia tha se qëllimi kryesor i baterive të integruara me centralet diellore është ruajtja e energjisë kur çmimet në treg janë të ulëta dhe shitja e saj kur çmimet rriten.
Sipas tij, kjo mund të rrisë të ardhurat e centraleve fotovoltaike, të përmirësojë leverdishmërinë e investimeve dhe të shkurtojë periudhën e kthimit të tyre.
Maqedonia e Veriut ka kaluar tashmë pragun prej 1 GW kapacitete të instaluara diellore, ndërsa zhvillimi i shpejtë i centraleve fotovoltaike po rrit edhe nevojën për magazinim dhe fleksibilitet në sistemin energjetik.
Dimitrov pret që gjatë pjesës së mbetur të vitit të përshpejtohen procedurat administrative për projektet e mëdha diellore dhe BESS që tashmë janë përfshirë në planet kombëtare dhe kanë marrë miratimin për lidhje me rrjetin. Sipas tij, këto projekte mund të nisin ndërtimin gjatë vitit 2027.
Paralelisht, pritet të vazhdojë zhvillimi i sistemeve diellore dhe baterive për konsumatorët komercialë dhe industrialë. Interesi i këtyre konsumatorëve lidhet kryesisht me uljen e kostove të energjisë, rritjen e sigurisë së furnizimit dhe përdorimin më efikas të energjisë që prodhojnë vetë, njofton Energy Monitor.
Maqedonia e Veriut ka bërë tashmë disa hapa konkretë në këtë drejtim. Në shkurt, në centralin fotovoltaik të Novacit u vu në funksion një sistem baterish prej 30 MW/60 MWh, i integruar me impiantin diellor prej 55 MW. Projekti ishte sistemi i parë i madh i këtij lloji në vend.
Ndërkohë, zhvillimi i tregut të baterive në Maqedoninë e Veriut ka qenë i shpejtë. Në tetor 2025, vendi kishte pranuar aplikime për projekte BESS me kapacitet të përgjithshëm prej 4.2 GW, duke treguar interesin në rritje të investitorëve për kombinimin e energjisë diellore me magazinimin.
Zhvillimi i baterive po bëhet veçanërisht i rëndësishëm për Maqedoninë e Veriut, e cila gjatë viteve të fundit ka shtuar me shpejtësi kapacitetet diellore. Magazinimi mundëson që një pjesë e energjisë së prodhuar gjatë orëve me diell të përdoret më vonë, duke ulur presionin mbi rrjetin dhe duke rritur fleksibilitetin e sistemit.
